తిరుమల నీటి అవసరాలను పరిపుష్టం చేసే కుమారధార - పసుపుదార పథకానికి ఆఖరి అడ్డంకి తొలగిపోయింది. ఈ జంట ప్రాజెక్టు నుంచి తిరుమలకు నీటిని తీసుకొచ్చే పైపులైన్‌కు అటవీశాఖ అనుమతి మంజూరు చేసింది. తిరుమలకు నీటిఎద్దడి రాకుండా నివారించేందుకు అయిదేళ్ళ కిందట ఈ ప్రాజెక్టు చేపట్టారు. దీనిద్వారా 84 మిలియన్‌ క్యూబిక్‌ అడుగుల నీటిని నిల్వచేస్తారు. ఈ ప్రాజెక్టుల నుంచి పాపవినాశనం మీదుగా తిరుమల వరకు పైపులైన్‌ నిర్మించాల్సి ఉంది. ఇది పూర్తయితే వచ్చే 20-30 ఏళ్ల వరకు తిరుమలకు నీటిఎద్దడి అన్నదే ఉండదు. ప్రస్తుతం తిరుమల నీటి అవసరాల కోసం కల్యాణిడ్యాం నుంచి 12 లక్షల గ్యాలన్ల నీటిని ఎత్తిపోతల ద్వారా సమకూరుస్తున్నారు.

దీనివల్ల తితిదేపై విద్యుత్తు చార్జీ రూపేణా కోట్లాది రూపాయలు ఆర్థిక భారం పడుతోంది. ఈ జంట ప్రాజెక్టులు పూర్తయితే అటు నీటి అవసరాలు తీరడంతోపాటు తితిదేకి ఆర్థికభారం తగ్గుతుంది. ఈ క్రమంలో కుమారధార నుంచి తిరుమలకు వేయాల్సిన పైపులైన్‌ నిర్మాణంపై అభ్యంతరాలు వ్యక్తమయ్యాయి. పైపులైన్‌ నిర్మాణంతో బాటు... వాటి నిర్వహణ చేపట్టేందుకు పైపులైన్‌ పొడవునా రోడ్డు నిర్మాణానికి 75 అడుగుల వెడల్పు స్థలం కావాలని అటవీశాఖను కోరింది. ప్రతిపాదిత సంస్థలో బంగారు బల్లి , దేవాంగపిల్లి వంట జీవాలతోబాటు అత్యంత అరుదైన ఔషధమొక్కలు కూడా ఉన్నాయి. వాటికి ముప్పువాటిల్లుతుందని అటవీశాఖ అనుతులను నిరాకరించింది.

ఈ రెండేళ్ళలో తితిదేకు ,అటవీశాఖకు మధ్య చర్చలు నడిచాయి. మ«ధ్యమార్గంగా అలైన్‌మెంట్లను మార్పులు చేస్తే పర్యావరణానికి తక్కువ నష్టం జరుగుతుందని అటవీశాఖ సూచించింది. దాని ప్రకారం రోడ్డ్డు వెడల్పు బాగా కుదించేశారు. కేవవలం 10 మీ. వెడల్పుతోనే రోడ్డు నిర్మాణాన్ని చేపట్టాలని నిర్ణయించారు. కుమారధార నుంచి తిరుమల వరకు 7.5 కి.మీ దూరం పైపులైన్‌ వేయనున్నారు. రూ. 13 కోట్ల వ్యయంతో మెగా కన్రస్టక్షన్‌ సంస్థ ఈ పనులను చేపట్టింది. కుమారధార నుంచి పాపవినాశనం వరకు మొదటిదశలో పంపింగ్‌ చేస్తారు. అక్కడినుంచి ప్రస్తుతం ఉన్న పైపులైన్లకు సమాంతరంగా తిరుమల దాకా కొత్తపైపులైన్లను వేస్తారు. ఈమధ్యలో 30 లక్షల లీటర్ల సామర్థ్యంలో కసువు చెరువువద్ద రిజర్వాయర్‌ను నిర్మిస్తారు.

పరిమితులకు లోపలే ః సీసీఎప్‌ మల్లికార్జునరావు

తితిదే గతంలో ప్రతాపాదించిన రోడ్డుల్లో ఎస్వీ అభయారణ్యంలో జీవనవైవిధ్యానికి ముప్పు ఏర్పడుతుంది. కొన్ని పరిమితులకు లోబడే అనుమతులిచ్చాం. అలైన్‌మెంటు మార్పించాం. ప్రస్తుత అలైన్‌మెంటుతో పర్యావరణానికి కలిగే నష్టం తగ్గడంతో బాటు తితిదేకు కూడా ఆర్థిక భారం తగ్గుతుంది.