వ్యాపారులు, రాజకీయ దళారుల అవినీతి, అధికారుల కబంధహస్తాల్లో నలిగిపోతు న్న తిరుమల పవిత్రతను కాపాడటం హిందువులుగా ప్రతిఒక్కరి బాధ్యతని హిందూ దేవాలయాల పరిరక్షణ సమితి అధ్యక్షుడు కమల్‌కుమార్‌స్వామి పిలుపునిచ్చారు. గురువారం తిరుపతిలోని ఓ ప్రైవేటు కళ్యాణమండపంలో తిరుమలను కాపాడుకుందాం అనే అంశంపై భక్తి సదస్సు జరిగింది.

ఈ సదస్సులో ఆయన మాట్లాడుతూ... మితిమీరిన రాజకీయ జోక్యం, ఉద్యోగుల్లో క్రమశిక్షణా రాహిత్యం, జవాబుదారి తనం లోపంతో తిరుమలను ధనవంతుల పర్యాటక, విలాస కేంద్రంగా మార్చుతున్నారని ఆవేదన వ్యక్తంచేశారు. హిందూ దేవాలయాల పరిరక్షణకు ప్రాణాలైనా అర్పిస్తామన్నారు. తిరుమల పరిరక్షణకోసం శ్రీగురుపీఠం ట్రస్ట్ ప్రారంభించిన ఉద్యమాన్ని ప్రపంచవ్యాప్తంగా విస్తరించి హిందువులను ఏకం చేయనున్నట్లు తెలిపారు.

అర్జితం టికెట్ల కుంభకోణం, డాలర్ల కుంభకోణాలకు పాల్పడుతున్న అధికారుల వీపులు పగులగొట్టేలా భక్తులు ఉపక్రమిస్తున్నారని హెచ్చరించారు. శ్రీగురుపీఠం ట్రస్టు ఛైర్మన్ సుంకర వెంకటేశ్వరరావు మాట్లాడుతూ పనికిమాలిన వారికి అడ్డదారుల్లో దర్శనాలు చేయించే బోర్డు సభ్యులవల్లనే అర్చక వ్యవస్థ, అధికార వ్యవస్థ భ్రష్టు ్టపడుతున్నాయన్నారు. భక్తి విప్లవం రానుందని అందులో దళారులతో నిండిన పాలకమండలి, అవినీతి అధికారులు కొట్టుకుపోతారని సూచించారు.

పీసీసీ సంయుక్త కార్యదర్శి నవీన్‌కుమార్‌రెడ్డి మాట్లాడుతూ టీటీడీ పాలకమండలి పేరు మార్చి సేవకుల మండలిగా మార్చాలని సూచించారు. అధ్యాత్మిక చింతనతో ఉండే వారినే టీటీడీ ఛైర్మ న్‌గా నియమించా లని డిమాండ్‌చే శారు. వకుళామాత ఆలయాన్ని పునర్ నిర్మించాలని డిమాండ్‌చేశారు. సభ అనంతరం తిరుమలకు పాద యాత్ర చేపట్టారు. హైదరాబాద్‌నుంచి 781 కిలోమీటర్లు పాదయాత్ర చేసి ్తవచ్చిన శ్రీగురుపీఠం అధ్వర్యంలో అలిపిరి వరకు మహాపాదయాత్రను అఖిలపక్ష నాయకులు ప్రారంభించారు.

జిల్లాలోని జానపద వృత్తి కళాకారులు గురువారం తిరుమలకు మహా పాదయాత్ర చేపట్టారు. తమ డిమాండ్లపై శ్రీవారి హుండీలో వినతిపత్రాన్ని సమర్పించాలన్న ఉద్దేశ్యంతో వీరు కోలాటం, చెక్కభజ నలతో ఉదయం 300 మంది అలిపిరి వద్దకు చేరుకున్నారు. ఇక్కడ వీరిని పోలీసులు అడ్డుకున్నారు. దీంతో కళాకారులు అలిపిరి రోడ్డుపై నే బైఠాయించారు. ఈ సందర్భంగా కళాకారుల సంఘం జిల్లా నేత యాదగిరి మాట్లాడుతూ.. మార్చి పదో తేదీన అన్నమయ్య జయంతి సందర్భంగా టీటీడీ చైర్మన్ ఆదికేశ వులు నాయుడు, ఈవో కృష్ణారావు ను కలసి తాము ఏడు సమస్యలపై వినతిపత్రాలిచ్చామని గుర్తుచేశారు.

వీటిలో ఒకటీ ఇంతవరకు అమలు కాలేదని ఆవేదన వ్యక్తంచేశారు. 66 మండలాల్లోని కళాకారులకు 24 గంటలు, ఆరు బృందాలకు భజన చేసే అవకాశం కల్పించాలని కోరారు. నిరుపయోగంగా ఉన్న టీటీడీ కల్యాణ మండపాలను కళాకారుల శిక్షణకు ఇవ్వాలని విజ్ఞప్తి చేశారు. ధార్మిక సలహా మండలి, జిల్లా, మండల కమిటీల్లో కళాకారులకు అవకాశం కల్పించాలన్నారు. భజన మండలి బృందాలకు ప్రతి గ్రామానికి మైకు, వాయిద్య పరికరాలు, యూనిఫామ్ ఇవ్వాలని కోరారు.

దేవాలయంలో జరిగే ఉత్సవాల్లో మండల పరిధిలోని కళాకారులకు అవకాశం కల్పించాలన్నారు. దీనికిగాను వారికి చార్జీలు, భోజన వసతి ఏర్పాటు చేయాలన్నారు. కళాకారుల గురువులకు ఏడాదికి ఒకసారి గౌరవ సన్మానం, గౌరవ వేతనం ఇవ్వాలని, కళాకారుల సాంస్కృతిక కార్యక్రమాలు జరుగుతునప్పడు డీపీపీలో ప్రత్యేక కమిటీలు ఏర్పాటు చేయాలని ఆయనడ డిమాండు చేశారు. ఈ కార్యక్రమంలో చిన్నబ్బ, వడివేలు, రెడ్డెమ్మ, రమణమ్మ, శ్రీనివాస్‌రెడ్డితోపాటు జిల్లాలోని కళాకారులు పాల్గొన్నారు.