తిరుమల పవిత్రతను కాపాడాలని, టీటీడీలో అక్రమాలను అరికట్టాలంటూ హైదరాబాదులోని గురుపీఠానికి చెందిన వంద మంది సభ్యులు గురువారం కాలినడకన తిరుమల చేరుకున్నారు. వీరి మహాపాద యాత్రలో భాగంగా అలిపిరి నుంచి శాంతి యుతంగా గోవిందనామ స్మరణలతో రాత్రి 8 గంటలకు తిరుమలకు వచ్చారు.ఆ సంస్థ అధ్యక్షుడు సుంకర వెంకటేశ్వరరావు, గాయని కొండవీటి జ్యోతిర్మయి వీరు తిరుమలకు చేరుకున్నారు. శ్రీవారి హుండీలో వేసేందుకు తమవద్దనున్న డిమాండ్లుతో కూడిన వినతిపత్రాలను అలిపిరి టోల్‌గేట్ ప్రాంతంలో సెక్యూరిటీ సిబ్బంది బలవంతంగా లాక్కున్నారని ఆవేదన వ్యక్తంచేశారు.

కొండకు చేరుకున్న వీరు ఆలయం ఎదురుగా ఉన్న అఖిలాండం వద్ద కర్పూరం వెలిగించి మొక్కులు తీర్చుకున్నారు. అనంతరం
గాలిగోపురం వద్ద పొందిన దివ్యదర్శనం టోకన్లతో వైకుంఠం క్యూకాంప్లెక్స్ నుంచి స్వామివారిని దర్శించుకున్నారు.

అలిపిరి పాదాల మండపం వద్ద జెండాలు, బ్యానర్లతో వచ్చిన పాదయాత్రను టీటీడీ విజిలెన్స్ అధికారులు అడ్డుకున్నారు. బ్యానర్లు తొలగిస్తేనే అనుమతిస్తామని హుకుం జారీచేశారు. తిరుమల పవిత్రతను కాపాడటం కోసం వందల కిలోమీటర్లు పాదయాత్ర చేసి వచ్చిన వారిని ఇలా అడ్డుకోవడంపై అఖిలపక్షం, శ్రీగురుదత్త పీఠం భక్తులు విజిలెన్స్ అధికారులతో వాగ్వివాదానికి దిగారు.

ఓదశలో ఉద్రిక్తత పరిస్థితి నెలకొంది. చివరకు బ్యానర్లు, జెండాలు లేకుండానే యాత్ర జరిగింది. ఈ కార్యక్రమంలో టీడీపీ నాయకులు నరసింహయాదవ్, నీలంబాలాజీ, తిరుమల తిరుపతి సంరక్షణ సమితి అధ్యక్షుడు నరేంద్ర, మంగాడి గోపాల్‌రెడ్డి, ఇనుకొండ సుబ్రమణ్యం, సైకం జయచంద్రారెడ్డి, శ్రీదేవి, శ్రీగురుదత్త పీఠం భక్తులు పాల్గొన్నారు.